لامؤاخذة يا مجلس احنا مش كاوركات

في الاول كدة انا مش من انصار المجلس الرئاسي المدني لان ده موقف سياسي ساذج بجد بس انا عايزة اقول ان الكلام حوالين الجيش النهاردة هو انتقاد للدور السياسي الي قبل انه يلعبه يوم 11 فبراير و زي ما المجلس العسكري قال للمصريين *  مش للمصريين للامريكان * اتطمنو مش هيبقى حكم عسكر زي ما طلبت منهم السيدة كلنتون عشان يفصلو ديمقراطيه على مقاس الامريكان و زي ما هما وعدو المصريين * مش المصريين الصهاينة * انهم هيحافظو على الاتفاقيات الدولية الي هي بالنسبة لهم اتفاقية كامب ديفيد بس بدليل مرسوم قانون الحق في العمل الي بيمنع الاعتصامات و الاضرابات الي المفروض انهم موجودين في الاتفاقيات الدولية سابقة الذكر بالنسبة لي انا بكره الجيش من الاصل الجيش في المطلق برتبه ببدله بنياشينه بطبقيته الي بتخليه ضد اي ثورة شعبية بالضرورة بس الي بيميز الجيش المصري الدور الي لعبه ف بناء الدولة الحديثة ايام محمد علي بس برضو هو نفس الجيش الي طلع الاخوان يهتفو ضد الديمقراطية عشان يلزقلنا 59 سنة ع الكرسي و رالمؤسسة العسكرية فضلت شاهدة على قمع و افقار الشعب المصري طول السنين دي  و شكلهم فيهم ناس عايزة تعيد السيناريو و اقصد بكدة قائد الاركان الي ركب الناقة من بلاد الامريكان عشان يلحق سقوط مشروع التوريث و يركب على نفسنا و يركب هنا بالمعنى القبيح للكلمة و ف نفس ذات الوقت محمد نجيب بتاعهم * الي هو طنطاوي * مش من انصار الديمقراطية زي نجيب او تقدرو تقولو اتعلم الحكمة من راس نجيب الي اتنفى و قاعد لغاية ما يخلصو الليلة دي زي ما ترسى يعني ايام و هتعدي يعني و من انقلاب الضباط الاحرار الى رغبة المجلس العسكري ف التغطية على فساده الي هو جزء من فساد نظام ثار المصريين ضده عايز يضمن لنفسه نهاية مشرفة و ببساطة يعني المجلس العسكري مطلعش جدع معانا ولا حاجة بس كان خايف ان الثورة تفضحه او تقسمه و ده كان تحليل ناس كتير ف الميدان و ثورة العشوائيات عملتله كالو ف دماغه و حب يقفل الموضوع فراح ممشي الراجل الكبير واعدا اياه بتضبيط دماغ المصريين عشان يسيبوه يخلع بسلام و انا مش بدين المجلس ف ده لاني عارفة ان علاقات العسكر عامله كدة زي علاقات الرفاق اهم من علاقتهم حتى باهلهم 
خطوات المجلس بقى كانت محسوبة جدا
لانه من اول لحظة ادى ضوء اخضر للسلفيين بالتحرك زي ما يحبوا عشان يوقف الثورة عند حدها و الي تابع المساجد ف وقت التنحي هيفهم انا اقصد ايه و كمان عرف يقلوظ العمة لكل القوى اللامؤاخذة سياسية و وزع الادوار بذكاء شديد من وجهة نظري و بيلعب بكل القوى بس مش عارف يكسب ليه بقى ؟ عشان بقايا النظام التانية بتقول اشمعنى
عشان كدة بيلاعبهم برجالتهم المحبوسين الي هو مش عايز يحاكمهم بجد لانه لو عايز ده كان من اول لحظة اشتغل على استقلال القضاء و اقال النائم العام و ده كان هيبقى عندي شخصيا اهم بكتير من الي عمله و لو كان ف دماغه يحجم حركة الي بيقولو اشمعنى كان حل المحليات الي بقاله عشرميت يوم بيقول انه هيحلها بعد ايام لغاية ما اسناننا وقعت طيب  المجلس العسكري لازم يتحرك اسرع ف ضمانات الديمقراطية عشان شركة الموبايل الي بتحولو رصيد فلست و قفلت
و يبطل يعاير المصريين بوطنيته و يرجع الامن على اساس سليم و رجاء خاص يا مجلس متجوعوش المصريين و تضغطو عليهم بالاسلاميين و الفوضى عشان كده كخ عشان انتو بتاكلو من ضرايبنا زيكو زي الشرطة و عايشين على تجنيد اخواتنا و ولادنا و افتكرو ان الجنود ولاد العشة مش القصر و اتعاملو مع نفسكو على انكو بتأدو وظيفة و لو معديتوش الاختبار احتمال كبير الشعب يفصلكو و الي هيفصلولكو المرة دي هما سكان العشة كلهم مش ولاد الناس الكويسين و انتو عارفين من ايام اضراب الامن المركزي انه الفقرا مش بتوع كلام و مش كاوركات و احب في النهاية اقولكو لو دامت لغيرك مكنتش وصلتلك و يالا حسن الختام وخليكو عاقلين بدل الفضايح و هدية بقى عشان ربنا يديم الانتقاد
http://www.maikelnabil.com/2011/03/blog-post_07.html